घसबट्टी उप्पर अज़माए जंदे न
जाची-परखी दोस्त बनाए जंदे न ।
बैरी गी ओठें पर थाह्र नेईं थ्होंदा
गीत ते सज्जनें दे गै गाए जंदे न ।
पता बी है भुंचाल ने ओचक आना ऐ
ताह्म्मी ते घर-बाह्र सजाए जंदे न ।
चौक-चबारैं इं’दा चर्चा ठीक नेईं
घर दे मसले घर नपटाए जंदे न ।
सुनेआ हा के एह् सज्जनें दी बस्ती ऐ
इत्थै बर्छे की पलेआए जंदे न ?
बेह्ल्लें दी बस्ती बिच्च होर केह् होंदा ऐ
बस राई दे प्हाड़ बनाए जंदे न ।
सतयुग होवै भामें कलयुग, दौनें इच्च
सिद्धे-सच्चे लोक सताए जंदे न ।
दिलै गी पोचा लाना कुसै ने भाखा नेईं
दिन-रातीं चेह्रे चमकाए जंदे न ।
