शैह्र-ग्राएं छिंझां पाचै
आओ, इं’दे भेड़ लुआचै ।
फुट्टै नेईं कोई हिरखी पौंगर
आओ, ऐसा छट्टा लाचै ।
तां गै चलनी साढ़ी हट्टी
दंगे-कतल फसाद कराचै ।
धर्म बनी गेआ अज्ज ऐ साढ़ा
अग्गां कि’यां कु’त्थै लाचै ?
दूरा दा फ्ही दिक्खो तमाशे
आओ, मुर्गे-मछली खाचै।
चोरी, स’न्नां, डाके मारी
आओ, धर्मी नाह्रे लाचै ।
माह्नू जीवन फ्ही नेईं थ्होना
आओ, किश करियै जाचै ।
सूरज-चंदा सब दे सांझे
आओ, ऐसियां किरणां पाचै ।
आपै हस्सो, दुनियां रोऐ
दुनियां छोड़ी जेल्लै जाचै ।
