तम्हूड़ियें दे खक्खरे दी अपनी पछान ऐ
बिस्सु आह्ले डंगें इच पीड़ें आह्ली जान ऐ
दुंब खड़ी करी बिच्चु माऊ गी खंदे न
सप्पै दे ञ्यानें नस्सी दूर-दूर जंदे न
धरती उप्पर इं’दी बी अपनी गै शान ऐ
बिस्सु आह्ले डंगें इच पीड़ें आह्ली जान ऐ
तम्हूड़ियें दे खक्खरे दी अपनी पछान ऐ।
गांदियां न गीत सुरां लाई चिड़ियां
जंदियां न जान्निया बूरा खाई कीड़ियां
रुक्की-टुक्की खंदियां न त्रिड्डियां लीरें गी
फुट्टी-फुट्टी बौंह्दियां न दिक्खी एह् सीरें गी
उड़कने दी इं’दी इक दूरै दी पन्छान ऐ
बिस्सु आह्ले डंगें इच पीड़ें आह्ली जान ऐ
तम्हूड़ियें दे खक्खरे दी अपनी पछान ऐ।
डड्डुएं दी अपनी गै टौह्र बक्खरी
इं’दियें बी सुरें दी र्होल अक्करी
सप्पें दियां मौजां, डकारें रज्ज लांदे न
मस्त जोआनी इच सूंकां एह् पांदे न
बिच्चुं बी मन्ने दा इं’दा गै मसान ऐ
बिस्सु आह्ले डंगें इच पीड़ें आह्ली जान ऐ
तम्हूड़ियें दे खक्खरे दी अपनी पछान ऐ ।
संघनी बी दाऽ लाना कदें बी नेइयूं छोड़दी
बूह्टे नै कलावा पाई दब्बी एह् मरोड़दी
क्रौंकलें दे कुंडे तुस दस्सो कदें छड़ाइयै
गनाह् बी मन्नी दी इं’दी गै भरजाई ऐ
रियूंगल बी डल्लें इच बौंह्दा जाई शमान ऐ
बिस्सु आह्ले डंगें इच पीड़ें आह्ली जान ऐ
तम्हूड़ियें दे खक्खरे दी अपनी पछान ऐ।
कोरोना बी डंग मारी छब्ब लाई जा दा
संघी घोटी माह्नुऐ दी लम्मे पाई टकाऽ दा
दो मीटर छिंडा रक्खी औना कन्नै जाना ऐ
मूंह् लाई मास्क असें कोरोने गी नसाना ऐ
देश-बदेशैं माह्नू कीता परेशान ऐ
बिस्सु आह्ले डंगें इच पीड़ें आह्ली जान ऐ
तम्हूड़ियें दे खक्खरे दी अपनी पछान ऐ
‘कुंडरिये’ गी सदा गै बिस्सु नै मरोड़ेआ
पैरें दा ल्हु मेरा जुक्कें ने नचोड़ेआ
धरती उप्पर जीव कम्म करी चले अपने
जख्में दे गत्त खाल्ली मरी-गले सक्खने
रत्तु कन्नै जिंदगी होई परेशान ऐ
बिस्सु आह्ले डंगें इच पीड़ें आह्ली जान ऐ
तम्हूड़ियें दे खक्खरे दी अपनी पछान ऐ ।
