मंदरें दी घैंटी
मसीती दी अजान,
गिरजाघरें दी प्रार्थना,
गुरद्वारें दी गुरबाणी दी मिट्ठड़ी तान –
एह् सब सुर मीं भांदे
मेरा मन-चित्त लांदे
मेरे साहीं ज्हारां लोक खचोंदे
भीड़ बनांदे
आ’ऊं बी भीड़ा कन्नै भीड़ बनी जंदी
उं’दे च दड़ी-दड़ी बौंह्दी
खुशी-खुशी, हसदे-हसदे
मेरे कन्नै ज्हारां लोक चलदे
जाने-अनजाने
जेह्ड़े
मीं मेरा गै हिस्सा बझोंदे
जदूं कदें जिसलै भीड़
खिट्टां लांदी
रौला पांदी
किश खिंझदे-बिझदे
केईं बारी
में जान बचाई बी लैंदी
पर
समें दी घड़ी
समें-समें पर
मिगी भेड़-चाल चलने शा चितेआंदी
अपनी चाल रोकने लेई पतेआंदी
पर जिसलै भीड़
शतान बनी गेई
‘में-में, मेरी-मेरी’
पर गै भिड़ी पेई
मेरा अंध-भक्ति दा भरम त्रुट्टा
मेरे अंदर इक बक्खरा सुंब फुट्टा
मिगी हून बी सब सुर भांदे न
मेरा मन-चित्त लांदे न
पर
हून मिगी भीड़ा दी लोड़ नेईं
हुन में भीड़ा शा बक्खरी आं
जित्थै मन करदा जाई बौह्न्नीं
कुसै दी धक्काशाही नेईं मन्ननीं ।
