अनसोधे पैंडे पर चलदे
पैंडे गी मंज़िल इच्च ढलदे
झल्ली लैंदा सब किश बंदा
पर किन्ना किश छुड़की जंदा ।
किन्ना डूंह्गा सर जीवन दा
भेत भी बक्खरा हर जीवन दा
किन्ना बी कोई होऐ ढंगी
सोचे इच्च पेई जंदी तंगी
कश लभदे जे डुबदा डंगा
तां किन्ना किश छुड़की जंदा ।
दरिया आंह्गर उ’आं सजदा
नित्त जो सजरा होइयै बगदा
सुक्कन सीरां कुरजो-कुरजी
खीर गलोंदा– ‘ओह्दी मर्जी’
थिड़की जाऽ जे जीवन बंबा
तां किन्ना किश छुड़की जंदा ।
न्हेरी कुक्खा जीवन पलदा
तखलीकै इच्च पल-पल ढलदा
चन्न-चाननी खेढां करदे
जीवन रस फुल्लै इच्च भरदे
बस अंजांता रौंह्दा बंदा
हर पल किश-किश छुड़की जंदा।
मिट्ठियां तानां हवा इच्च घोलां
हिरख-समोधी बोल बी बोल्लां
सूरज दे लशकारे स’लनीं
न्हेरें दी बुछकी इच्च धरनीं
जे उत्साह बिंद पेई जाऽ ठंडा
तां किन्ना किश छुड़की जंदा ।
