जीना झूठ, मरना सच्च
लौह्की सच्ची तेरी कत्थ।
आई खड़ोना मौतै जिसलै
थर-थर कबंने पुरजे उसलै।
तरले-मिन्नतां नेईं मनोने
बनियै-ठनियै औन परौह्ने।
यम्में आइयै पाना घेरा
बेही-खाता दस्सना तेरा ।
होने मसौदे सारे रद्द
फड़ना सिद्धा तेरा हत्थ।
तूं’ऐ चलना बनी सुआरी
भलेआ लोका, होई तेआरी।
छंडना, रोना, तूं करलाना
धीएं-पुत्तरें गल निं लाना।
सुआसें कन्नै जंग लड़ानी
मौतै जित्तनी, तूं हरानी ।
मैह्ल-चबारे इत्थै रौह्ने
भरे खज़ाने कम्म निं औने।
अपने तेरैं फर्ज नभाना
आपूं पैह्ला लाबूं लाना।
मुश्कल होना मोह् छड़ाना
ठोकर लग्गनी फ्ही पछताना।
ठग्गियैं-झूठैं उमर गुआई
मौके सिर निं होई कमाई।
तांइयों जाना औखा होएआ
सब पराया, कैह्सी रोएआ?
लौह्की तेरी कत्थ बनाई
सोच-बचारी कर कमाई।
उसनै तेरा साथ नभाना
खाल्ली आया, खाल्ली जाना।
