जिस घट मेदी दीआ बलदा उज्जल करै चौपासी
उस घट चंदरी कुद्धरा आइयै डंगी जाऐ दुआसी
इस घट कु’न जो उच्चे पर्वत,गास पलैं फरलांगै
ओह् कु’न जो मन निक्का करियै अत्थरुएं गी हांबै
दब्बी चुंझ सोहाके फंघैं,जिस घट हैंसा रौंह्दा
उस घट कु’न जो थाह्र-कथाह्रै मुक्ति तुपदा रौंह्दा
अनगिनते तालें ते सत्त सुरें दा जिस घट बासा
उस घट कु’न जो ताल बेताला नच्चै करै तमाशा
जिस घट कोमल भाव भरोचे फुल्ल गीतें दे खिड़दे
उस घट कुद्धरा भाव जांगली छड़की भड़की भिड़दे
जिस घट नंद लोआरै पेदा,हिरख धड़कनैं धड़कै
उस घट कु’न शतूना ऐ जो निं मन्नै, नेईं झक्कै
लैह्री-बैह्री हिरखी दरेआ जिस घट कदें निं सुकदा
उस घट कु’न जो निग्घ भरोचे सरबंधें गी तुपदा
कु’न जो ज़ैह्नी सफर जो रौंह्दा,भेत दनां नेईं खोह्ल्लै
ओह् कु’न जो नित राड़-बराड़े करदे दनां निं डोल्लै
खुशी दुआसी ठगदी कुसगी,कु’न जो करै सबीलां
कु’न कुसगी भरमाने खातर घड़दा र’वै दलीलां
अक्खीं मीटी लाई समाधी कु’न कुसगी ऐ तुपदा
कु’न पसोंदा जन्म-दिनें पर,कु’न हर ब’रै प मुकदा।
