में अपने मरने बाद
इक कविता लिखी
नां मेरे कोल कागज़ हा नां पैन्न
पैन्न फड़ने आह्ले हत्थ गै निं हे
इत्थुं तगर जे सोचने आह्ला दमाग बी निं हा
पर फ्ही बी
में इक कविता लिखी
एह् कविता लिखने आस्तै
नां मिगी पैन्न दी लोड़ ही
नां हत्थें दी
नां गै दमागै दी
इं’दे कन्नै वैसे बी
कविता कु’त्थै लखोंदी ऐ !
एह् कविता लिखने आस्तै
में ब्हाऊ दे फनूकें च जाई रलेआ
गासा दे शमानी तलिस्म च जाई घुलेआ
बूह्टें दी सैलतन च जाई हस्सेआ
मिट्टी दी खशबोई च जाई मैह्केआ
असल च
में आपूं गै कविता होई गेआ
अपने मरने बाद ।
