नमें बीएं दी लाई पनीरी, बूह्टे हुन उगाने
एह् अबादी मती बधाइयै, इ’यै जागत खढाने
इ’यै करनी हुन कमाई, सुखै दा साह् जे लैना
बूह्टै-बूह्टै पानी देइयै सुन्ना एह् उगाना
बिच्च बढ़ापै नेईं झकोंदे, बूह्टे उस्सी ढुआने
नमें बीएं दी लाई पनीरी, बूह्टे हुन उगाने
एह् अबादी मती बधाइयै, इ’यै जागत खढाने ।
गभरू जुआनो कैह्ल्ली जंदे ओ कम्मै कोला खिसकी
एह् बरेस नेइयों रौह्नी मुक्कनी ओ डुसकी-डुसकी
हत्थ-पैर जे ल्हाइयै चलगे तां गै साढ़ा जीना
लाई लैओ बूह्टे खाल्ली जग्हा जे पानी दा घुट्ट पीना
ओ जित्थै-जित्थै बाल-चरा हुन उत्थै मते लुआने
नमें बीएं दी लाई पनीरी, बूह्टे हुन उगाने
एह् अबादी मती बधाइयै, इ’यै जागत खढाने।
बंजर, लाह्म्मां, ढिब्बे हुन रौह्न निं देने खाल्ली
सदा-सुहागन, इस धरती पर लब्भै हुन एह् टाह्ल्ली
थाह्र-थाह्र हुन जाइयै मड़ेओ नमीं पनीरी लाओ
फर-फर खुशबू इं’दी झुल्लै, मांदी जान बचाओ
त्रुट्टी ल्हास पवा दे जित्थै बूह्टे बिच्च जमाने
एह् अबादी मती बधाइयै, इ’यै जागत खढाने
नमें बीएं दी लाई पनीरी, बूह्टे हुन उगाने।
बूह्टें कन्नै धरती लब्भै हर जग्हा नराली
नीला अंबर होंदा जि’यां होऐ इ’यां हरेआली
राखी करनी लाइयै एह् थाह्र-थाह्र फ्ही जम्मन
उतरी हवा दिंदे कन्नै लक्ख बमारी थ’म्मन
नंगी जग्हा हुन करेओ पड़दा, बड्ढने कोला बचाने
एह् अबादी मती बधाइयै, इ’यै जागत खढाने
नमें बीएं दी लाई पनीरी, बूह्टे हुन उगाने ।
कादर कुंडरिया गत्त कड्ढियै बूह्टे छुड़े लोआई
जे देऐ कोई पानी इ’नेंगी पौंगर जंदी आई
खुश होऐ फ्ही मन दिक्खियै जाड़ें दे एह् जाड़
सैल्लियां गै एह् ढक्कियां लब्भन कन्नै फ्ही पचोआड़
इक दुए कन्नै फ्ही रीसां लाइयै इं’दे गीत गोआने
एह् अबादी मती बधाइयै, इ’यै जागत खढाने
नमें बीएं दी लाई पनीरी, बूह्टे हुन उगाने ।
