में इक बारी कुंभ न्हौन गेदे,
अपनी सुर्ती च पेदे,
शब्दें मूजब,
जे गंगा गेदे तज्जनी होंदी ऐ
कोई सभनें शा प्यारी चीज़, म्हेशा-म्हेशा ताईं
ते में तज्जी आई ही अपनियें अक्खियें दा नीर।
मेरियें अक्खियें दा नीर गंगा-जलै नै इक-मिक होई
घुली ,रली गेदा ऐ सागरै दे अथाह् पानियै च ,
हून दूर, मेरियें अक्खियें शा अति दूर ।
हून नेईं छलकदे मेरियें अक्खियें दे कटोरे
तेरा दीदार होने पर बी
ते नां गै कुसै चेते पर बगदियां न एह् ।
में खुश आं अपनियें अक्खियें दे पानी गी तज्जी,
उसी दूर सागरै गी भेजी ।
में खुश आं ते नत-मस्तक आं
चौबियें घैंटें दी उस सलक्खनी घड़ी अग्गें
जिस च इक अनहोनी होनी होई गेई ही
ते में अपनियें अक्खियें दे पानी दी जिम्मेवारी शा बरी होई गेई ही ।
mam ji tunda a paryas sarahne jog a.