कुसै चीजै दी अति गै
ओह्दा अंत ऐ—
जदूं कुसै चीजै दी भुक्ख
घड़ी-मुड़ी लग्गै
बजाए दबाने दे
उस्सी लग्गन देओ
बधन देओ
नक्को-नक्क रजांदे र’वो
ओह् लग्गी-लग्गी अक्की जाह्ग
ते आपूं गै मुक्की जाह्ग
जदूं पीड़ां जागन
मत करो इंʼदे कन्नै मूंह्-रोबरियां
मनान देओ इʼनेंगी अपनियां अड़ियां
पार करन देओ अपनियां हद्दां
पीड़ां हद्दां लंघियै
आपूं गै दवाऽ होई जाङन
हांईं-मांईं मोह्
नां छुड़कदे न, नां गै त्रुट्टदे न
मोह् पाई रक्खो
इʼनेंगी पालो, नशे आंह्गर चढ़न देओ
अपना अमल पूरा करन देओ
एह् अपने भांबड़ें च बलियै
आपूं गै भस्म होई जाङन
मनै च बेचैनियें गी धमाल मचान देओ
मत करो थ’म्मने दी कोशश
चेता रक्खो–
इंʼदी इक मनेयाद ऐ
उस्सी पूरा होन देओ
एह् आपूं गै थक्की-हुट्टियै
मुक्की जाङन
मन जदूं नच्चिल्ला होग
अदूं गै सुख-चैन थ्होग
मत रोको चीजें दा कुदरती प्रवाह्
मत दबाओ इʼनेंगी
होन देओ इंʼदी अति
ते तमाशबीन बनियै दिक्खो
इंʼदा अंत ।
