केह् ऐ मेरी कविता
की लिखनां में कविता
कविता राहें चुननां टोटे
उस कविता दे
जो में हा
तुस हे
अस सब हे
ते पुच्छनां जे
ओह् कविता की भज्जी, खिल्लरी
बस, इ’यै किश करदा रौह्न्नां
बस, इ’यै किश करदा रौह्न्नां
इत्थै-उत्थै खिल्लरे दे टोटें गी
चुनदा, स’लदा रौह्न्नां
जिस दिन थ्होई जाने
ओह् सारे टोटे
ते अपनी-अपनी थाह्र जदूं टोटें गी थ्होनी
लोड़ तदूं कविता लिखने दी
मी नेईं पौनी
की जे कविता नेईं लिखदी कविता गी
कविता नेईं लिखदी कविता गी ।
