मन

मनै गी फंघ लग्गे दे होंदे न
इ’दी डुआरियें कशा अनजान निं में
पर अजकल्ल इसगी लम्मे-लम्मे कन्न ,निक्की नेही (अ)बाज़
ते
बड्डियां-बड्डियां अक्खीं बी लग्गी गेदियां न
वुहान, इटली, अमरीका
निजामुदीन
पालघर
घरें गी परतोंदी सिज्ज्ली अक्खीं आह्‌ली भीड़
ढेरो-ढेर जानकारियां
ढेरें दे ढेर मनोरंजन
ढेर-ढेर अपराधक चुप्पियां
सोशल मीडिया पर
बन्न-सबन्ने, बेचैन, बेसब्र शगूफे
सब किश दिखदा-सुनदा
फ्ही बुक्कल मारी
मिथकें ते
सत्यम शिवम सुंदरम दी बित्थें बश्कार
पद्‌म-आसन लाई
अक्खीं मीटी
लम्मा उज्जैई साह् भरी
आंतरिक चेतना दी जोत बाली
पूर्ण समर्पण कन्नै, साहें दे इकतारे दी संगत च
प्रेम भरोचे पद गान बेही जंदा ऐ, मन।