अच्छी सोच करियै असें अपने घरैं बौह्ना
हमला करी निं सकै उप्पर जालम एह् करोना
अपने घरैं पुज्जन ओह् बी फसे न जेह्ड़े बाह्र
उ’नेंगी आह्नन लग्गी ऐ देसै दी सरकार
मास्क लाने, हत्थ बी धोने, साफ-सुथरे रौह्ना
हमला करी निं सकै उप्पर जालम एह् करोना
अच्छी सोच करियै असें अपने घरैं बौह्ना
इक्कै साढ़ा ल्हु ते पिंजरा, इक्कै साढ़ी तसीर
हमेशा किट्ठे रौंह्दे आए आं, जम्मू ते कश्मीर
भाईचारे च रेहियै असें खुशियैं दिन गुजारे
घर-बार बी छोड़दे आए आं, इक-दुए दे स्हारै
फ्ही बी असें इक-दुए दे हिरखी बनियै रौह्ना
हमला करी निं सकै उप्पर जालम एह् करोना
अच्छी सोच करियै असें अपने घरैं बौह्ना
झूठी अफवाहें कशा बचना, एह् खढांदियां न जड़ियां
बिना मतलब बैह्स निं करनी, बैरी होंदियां न अड़ियां
चुक्क बी इं’दी भैन ऐ सक्की, एह् मरोआंदी थां
जिस पास्सै बी फूक मारै, उज्जड़े शैह्र-ग्रां
इं’दा कनैक्शन त्रोड़ी सु’ट्टो, फ्ही निं इ’नें मठोना
हमला करी निं सकै उप्पर जालम एह् करोना
अच्छी सोच करियै असें अपने घरैं बौह्ना
चूंडी भरदा एह् करोना, रूह् कलेजे खाई जा
दुनिया उप्पर कैह्र मचाइयै, घरें दे घर लुटाई’आ
जेह्ड़े फसेआ एह्दे घेरै ओह्दी जांच कराओ
आपसी छिंडा रखचै अस, मौका नेईं गोआओ
फ्ही बी गल्ल ब’नचै गंढी, घरैं दे अंदर बौह्ना
हमला करी निं सकै उप्पर जालम एह् करोना
अच्छी सोच करियै असें अपने घरैं बौह्ना
जिंदगी मती कीमती साढ़ी, इस्सी सांभी रक्खेओ
हिरखी रेहियै सभनें कन्नै रूहें दे अंदर बस्सेओ
एह् फरेआद, ‘कुंडरिया’ आखै घर-घर, मेरी पजानी
चार धेआड़े जिंदगी दे न, छेकड़ मुक्की जानी
रब्ब दे हत्थ ऐ कुंजी एह्दी अग्गें जो किश होना
हमला करी निं सकै उप्पर जालम एह् करोना
अच्छी सोच करियै असें अपने घरैं बौह्ना ।
