नमें चन्न

एह् केह्‌ड़े नमें गै चन्न चढ़ाई बैठे
बैठे-बैठे दे गल फ़ाह् पाई बैठे
अग्गें दस्सो केह्‌ड़े घट्ट शायर हे 
जेह्‌के तुस बी मैह्फ‌ल च आई बैठे!

कुतै प्हाड़ें च कुसै दी तपाश करदे
कुतै मालक दे नांs दी अरदास करदे 
एह् कम्म छोड़ी पक्का चाकरी आह्‌ला
तुस मालकें नै धोखा कमाई बैठे!

हत्थ फड़ेआ निं कदें ठूठा तुसें
जोग कमाया ओह् बी झूठा तुसें
जेकर निं हे पैहे पल्लै तेल जोगे
तुस (अ)खंड चिराग जगाई बैठे!

जे कीते हे करार तां भरोसा बी रखदे
जे नेईं परतोंदे तां रोस्सा बी रखदे
हिरखी चिट्ठियां सज्जनें दियां 
तुस गैरें दे हत्थ थम्हाई बैठे!

यार बनाने शा पैह्‌लें तुस अजमाई लैंदे
खेतर राह्‌ने शा पैह्‌लें तुस बाही लैंदे
बिच्च मझाटै छोड़ी जो मलाह् गे
उं'दे पिच्छें तुस करी लड़ाई बैठे!

सुरगा गी सुरग रौह्‌न गै दिंदे
द'ऊं घड़ियां चैना नै बौह्‌न गै दिंदे
कुंगले हत्थें चा खूस्सी किताबा
उं'दे हत्थ बंदूखां थम्हाई बैठे!