शराबी
दिनैं रातीं धिक्के खंदा, टुरदा टोर नवाबी टल्ले फट्टे, नुक्क घसीटा, आखन लोक शराबी। ना घर आटा खाने गित्तै, पीपे खाल्ली बज्जन बनी मतवाले बाह्रा आए, शेर जन गरजन डैडी-डैडी करदे गिल्लु, अग्गें-पिच्छें…
A
Ashok Birpuri
Writer
दिनैं रातीं धिक्के खंदा, टुरदा टोर नवाबी टल्ले फट्टे, नुक्क घसीटा, आखन लोक शराबी। ना घर आटा खाने गित्तै, पीपे खाल्ली बज्जन बनी मतवाले बाह्रा आए, शेर जन गरजन डैडी-डैडी करदे गिल्लु, अग्गें-पिच्छें नच्चन डैडी छपैली बोतल नैंह्गै, दिक्खी गिल्लु हस्सन दिनैं रातीं धिक्के खंदा, टुरदा टोर नवाबी टल्ले फट्टे, नुक्क घसीटा, आखन लोक शराबी। दिर-दिर करै रोज जनानी, जाऽ शरम निं मासा कोठै चढ़ियै रौला पांदा, लगदा मुख्त तमाशा भुल्ले गिल्लु खेढ-खढालीं, खिड़-खिड़ लोकें हासा निक्के-बड्डे चांबड़ताड़ी, नेईं कोई देऐ दलासा दिनैं रातीं धिक्के खंदा, टुरदा टोर नवाबी टल्ले फट्टे, नुक्क घसीटा, आखन लोक शराबी। बेल-कबेल्ला उस निं भाखा, लाड़ी नित्त नराज कु’त्थूं औंदे पैसे, मोआ, पीने लेई शराब बज्जै ढड्ड, स्यापा मुक्कै, जाऐं मरी तूं, मोआ बोतलें संग शराबी नच्चन, सज्जै खूब नड़ोआ निक्के-बड्डे सारे दिक्खन, दिक्खन सारे समाजी दिनैं रातीं धिक्के खंदा, टुरदा टोर नवाबी टल्ले फट्टे, नुक्क घसीटा, आखन लोक शराबी। नित्त सघंदा खंदा ‘बीरपुरी’ , उ’ऐ खुंड-गलामें कुसलै पीती, किन्नी पीती, ढलन लगे परछामें दिन सोहामें चेतै करियै रोंदे चाचे-मामे रोंदे जीवन लंघेआ सारा, खुशियें दिन तरसामें जीवन भार चकोंदा नेईं, गंढी कुल बरबादी दिनैं रातीं धिक्के खंदा, टुरदा टोर नबाबी टल्ले फट्टे, नुक्क घसीटा, आखन लोक शराबी।.
